كورسات مجانية من المركز المصري الألماني للوظائف و الهجرة و إعادة الادماج EGC

تم تأسيس المركز EGC بهدف تقديم المعرفة
للمصريين بشأن طرق التطوير و إيجاد فرص عمل,

و إعادة دمج المصريين العائدون من خارج البلاد

في البيئة المصرية من الجانب الاقتصادي و الاجتماعي.

الهدف من المركز المصري الألماني للوظائف و الهجرة

و إعادة الادماج هو تطوير الشباب من خلال دورات مجانية

و تطوير المهارات لتحسين فرصهم في إيجاد عمل مناسب في

ظل التطور الكبير في سوق العمل و صعوبة إيجاد عمل مناسب.

ما هي الخدمات المقدمة من المركز المصري الألماني؟

يعمل المركز بالتعاون المشترك بين الوكالة الألمانية للتعاون الدولي GIZ
تحت اشراف الوزارة الفيدرالية الألمانية للتعاون الاقتصادي و التنمية BMZ

و وزارة الدولة للهجرة و شئون المصريين بالخارج من خلال مبادرة مراكب النجاة.

و قد اثمر هذا التعاون لتوفير عدة خدمات:

1. معلومات عن الهجرة لألمانيا
2. التدريب
3. التوظيف
4. العودة و إعادة الادماج

قبل ان نذهب لطرق التقديم عن الخدمات, فدعنا نوضح

الخدمات بشكل واضح لتختار التدريب المناسب لك.

يقدم المركز دورات عديدة من أهمها:

خدمات الهجرة لألمانيا

المركز مبيسفرش حد لكن بيساعد الشباب في خطوات

التقديم للهجرة النظامية و بيسعدوك تقدم بشكل صحيح

و تستوفي الشروط المطلوبة من أوراق و خطوات تسجيل

و ده طبعاً بيزود فرصك في القبول.

لو مهتم تعرف عن القانون الجديد لهجرة العمالة الي المانيا وعن كيفية السفر لألمانيا والطرق الصحيحة للسفر وجميع الخطوات من مصدر موثوق منه املوا الاستمارة التالية وابعتها على ايميل: egc@emigration.gov.eg

لتحميل الاستمارة من هنا

فرصة تدريب مجانية بعنوان " ازاي تبقي Freelancer"

, و في الدورة دي هتتعلم ازاي تبدأ تشتغل عمل حر عن طريق

الانترنت و مواقع ال Freelance المختلفة, و تبدأ عملك الحر من 

البيت و تكتفي بيه كمصدر دخل أساسي او ثانوي بجانب عملك الأساسي.

فرصة تدريب الارشاد المهني

و الدورة دي حضرتها شخصياً و كانت من اهم 

الدورات الي استفدت منها و هقولك ايه المخرجات

الي وصلتلها من الدورة دي, و برشحلك الدورة دي

انك تدخلها قبل دخول الجامعة و هقولك السبب ايه كمان

شوية.

هتتعلم خلال الدورة دي:

• تفهم سلوكك و صفاتك الشخصية
• تكتشف اهتماماتك و دوافعك
• تحديد العمل المناسب لك من خلال عدة اختبارات
• التعرف علي متطلبات المهنة بتعتك و ازاي تطورها
• كيفية اجراء Informational interview

كل ده من خلال تدريب تفاعلي, و برنامج تدريبي مكثف 

معد من خلال مصمم برامج تدريب, في النهاية هتوضح

معاك رؤية مميزة عن هدفك في الحياة و ايه الوظيفة

المناسبة ليك من خلال اختبارات علمية.

فرصة تدريب فني مقدمة من المركز المصري الألماني  

بالتعاون المشترك بين المركز و شركة سيمنز العالمية

يقدموا تدريب لخريجي المدارس و المعاهد المتوسطة الفنية 

الصناعية, و التدريبات تكون في :

• أساسيات التحكم المبرمج Basic automation
• لحام القوس الكهربائي
• رومان البلي, صندوق التروس و المضخات
• التحكم الكهربي بدوائر ضغط الزيت

تدريب بعنوان ازاي توصل لفكرة مشروعك؟

هيوضحلك التدريب ده لو عاوز تفتح مشروع تبدأ منين؟

و كمان هتتعلم ايه خطوات توليد فكرة المشروع و مراحل

دراسة السوق و سبل التمويل و خطوات التنفيذ للمشروع

علي ارض الواقع؟

فرصة تدريب للمهندسين

كونك طالب هندسة محتاج تدريب, او مهندس

خريج عاوز تطور من نفسك فالمركز بالتعاون 

مع شركة سيمنز العالمية بيقدملك تدريب علي

مكن ال CNC و التدريب هيكون علي ثلاثة مراحل:

• التدريب علي المخرطة العادية
• التدريب علي اساسيات ال CNC
• التصنيع باستخدام الحاسب الالي

و بنهاية التدريب هتاخد شهادة من شركة سيمنز .

دورة مهارات التوظيف

هتتعلم علي مهارات الموظف المحترف الي صاحب

العمل بيدور عليها في الموظفين بتوعه:

• التواصل الفعال
• التنظيم و الإدارة 
• العمل الجماعي
• حل المشكلات

تدريبات خاصة بمجال البرمجة

التدريبات دي هتشمل جزئيين:

• Front-end web developer
• back-end web developer

بحيث تكون في نهاية المسار Full stack developer

تعمل مواقع و أنظمة من الصفر و تطور المواقع و هتتعلم

خلال الكورس لغات برمجة كتير زي:

• HTML
• CSS
• JAVASCRIPT
• PHP
• FRAMEWORK

 تدريب التأهيل الوظيفي

لو تعبت من كتر التقديم علي شغل و مفيش

HR بعتلك ل INTERVIEW, الحل انك

تفهم ازاي ال HR بيفلتر ال CV و بيختار

المتقدمين ازاي.

و خلال الدورة دي هتتعلم:

• ازاي تعمل CV احترافي
• ازاي تعمل COVER LETTER
• ازاي تظبط LINKEDIN

خدمات التوظيف من مركز EGC

المركز حالياً بيقدم خدمات توظيف للمؤهلات المتوسطة, و 

لما سالتهم علي المؤهلات العليا قالوا ناه هيتوفر قريب, و

كل فترة بيكون في ملتقي توظيف " بيدعوا شركات تيجي

المركز و يعملوا انترفيو للتوظيف داخل المركز" و ده هيسعدك

انك تلاقي فرصة مناسبة في شركات او مصانع كبيرة.

ازاي تقدم في خدمات و تدريبات المركز المصري 
الألماني للوظائف و الهجرة و إعادة الادماج EGC؟

تقدر تقدم في أي دورة عن طريق الاتصال بالمركز من خلال

الأرقام التالية:

01275989054 

01202744565

0227519410

تقدر تتواصل عن طريق الاتصال المباشر او التواصل عن طريق

الوتساب, و مواعيد العمل من 9:30 ص الي 3:30 م 

ما هو عنوان المركز المصري الألماني للوظائف و الهجرة و إعادة الادماج EGC؟

مبني رقم 17, شارع 18, المعادي, القاهرة

و اقرب محطة مترو هي ثكنات المعادي 

و لو انته جاي من شبرا الخيمة او الشهداء

هتنزل محطة السادات و تغير اتجاه حلوان

و تنزل ثكنات المعادي.

مميزات المركز في الدورات التدريبية؟

1. التدريب مجاني بدون مصروفات
2. المدربين مميزين جداً و ذو كفاءة
3. قاعات المحاضرات مكيفة و الكراسي مريحة
4. وجود مشروبات طوال اليوم
5. وجود Break و يقدم وجبة فطار و غداء
6. عمل اختبار كرونا سريع للمتدربين للسلامة

و في النهاية اللهم صل علي سيدنا محمد خير معلم.